26 марта 2013 г.
Чăваш Ен Пуçлăхĕ Михаил Игнатьев республика экономикине çĕнĕ технологипе пуянлатас тата модернизацилес тĕлĕшпе ĕçлекен канаш ларăвне ирттернĕ.
Социаллă пурнăçпа экономикăри инфратытăм проекчĕсене пурнăçа кĕртнĕ чухне усă куракан патшалăх тата уйрăм çынсен ĕçлĕ çыхăнăвне тишкернĕ. Уйрăммăн илсен Çĕнĕ Шупашкарти йăлари хытă каяш полигонĕн çулталăкра 100 пин тонна ăпăр-тапăр вырнаçтармалли иккĕмĕш площадкине тата ăна 200 пин тонна суйласа уйăрмалли комплекс тăвассине пăхса тухнă. Тĕп хула администрацийĕн пуçлăхĕ Алексей Ладыков пĕлтернĕ тăрăх - каяш уйăракан объект ĕçе кĕртнĕ инвесторсемпе çавнашкал комплекс хута ярасси пирки калаçу ирттереççĕ. Михаил Игнатьев полигон саккасçисене конкурс документацине çывăх вăхăтра хатĕрлеме, кăçалхи çĕртме уйăхĕнче конкурс йĕркелеме ыйтнă.
Республикăн онкологи диспансерĕн хирурги уйрăмĕн çуртне хăпартас ыйтăва та сÿтсе явнă. Пĕлтĕр ăна çĕклеме 45 млн тенкĕ уйăрнă. Кăçал ĕçе 29 млн тенкĕ явăçтараççĕ. Чăваш Ен Пуçлăхĕ объектăн тĕп подрядçине - республикăн капиталлă строительство управленине - банкран кивçен илме сĕннĕ. Тавăрмалли процент пайне республика хыснинчен саплаштарĕç.
Патшалăх тата уйрăм çынсен ĕçлĕ çыхăнăвне йĕркеленĕрен пурнăçа кĕрекен тепĕр объект - ухăран перекенсен Олимп центрĕ. Проекта самаях çĕнетнĕ: курав тата конгресс залĕ тума палăртнă. Кермене хута ярсан ăмăртусем ирттернипе пĕрлех куравсем, конференцисем йĕркелĕç. Вĕсем республика хыснине пуянлатакан çăл куçсем пуласса шанаççĕ.
Ял хуçалăх министрĕн çумĕ Наталия Виноградова 2015 çулччен пурнăçа кĕртекен инвестици проекчĕсемпе паллаштарнă. Хальхи вăхăтра пурнăçлаканни тата ĕçе кĕртме палăртни - 100 яхăн. Çав шутра - Патăрьел районĕнчи Ленин ячĕллĕ агрофирмăн 500 ĕне усрамалли ферми, Ферид Чабатов фермерăн биокаяш хатĕрлемелли цехĕ, Вăрнарти аш-какай комбиначĕн мăйракаллă шултра выльăх самăртмалли вити, Йĕпреç районĕнчи «Мясопром» общество корпусĕ, Куславкка районĕнчи «Карамышевский» хуçалăхăн пулă ĕрчетмелли пĕвисем тата ыттисем.
Кăçал выльăх пăхакан 6 çемье фермине аталанма 5-шер млн тенкĕ уйăрассине пĕлтернĕ. Экономика министрĕн çумĕ Владимир Аврелькин каланă тăрăх - иртнĕ икĕ çулта продукци туса кăларакан производствăна 30 млрд тенкĕлĕх инвестици хывнă. 2015 çулччен ăна «Промтрактор-Промлит» обществăн тимĕр шăратакан цехне модернизацилес ĕçе малалла тăсма, «Промтрактор» обществăра экскаватор, комбайн производствине йĕркелеме, В.И.Чапаев ячĕллĕ пĕрлешĕве, «ЭКРА», «ЭЛАРА», «АККОНД», «Чăваш Ен букечĕ», «Чăвашкабель», «ВНИИР», «ЧЭАЗ» обществăсене, ытти производствăна модернизацилеме явăçтарасшăн.
Ларура хăш-пĕр предприяти директорĕсене итленĕ, инвестици проекчĕсене пурнăçа кĕртессипе, патшалăх пулăшăвĕпе, тĕллеве ĕçе кĕртме чăрмантаракан çитменлĕхсемпе çыхăннă ыйтусене сÿтсе явнă.
«Пирĕн тухăçлă ĕçлекен предприяти-организацие, пĕчĕк тата вăтам бизнеса пулăшмаллах, - тенĕ республика Пуçлăхĕ. - Вĕсене ăнăçлă ĕçлеме май туса памалла. Çĕнĕ производствăсем йĕркелеччĕр, çынсене пысăк ĕç тухăçлăхĕпе палăракан, çÿллĕ шайри технологипе усă куракан вырăнсемпе тивĕçтерччĕр, вĕсенче вăй хуракансене тивĕçлĕ ĕç укçи паччăр».
Источник: "Хыпар"