28 июля 2015 г.
ЧР Пуçлăхĕн тивĕçĕсене вăхăтлăх пурнăçлакан Михаил Игнатьев июлĕн 25-мĕшĕнче Çĕрпÿ тата Канаш районĕсенче вырма еплерех пынипе паллашнă.
Михаил Васильевич Вăрманкас Чурачăк ялĕнче Андрей Хорошавин хресчен-фермер хуçалăхĕнче пулчĕ.
- Ялхуçалăх пĕлтерĕшлĕ çĕре 3700 гектара çитертĕмĕр, - терĕ Андрей Васильевич. - 18 тĕрлĕ культура пухса илетпĕр. Тăватă комбайн кĕрхисене вырса тĕшĕлет. Çĕрте нÿрĕк ытларах тытса юлмалли, тăпра пулăхне упрамалли технологие ĕçе кĕртрĕмĕр.
М.Игнатьев «ВДС» обществăн Чурачăк ялĕнчи уйне те çитрĕ. Унта 6 комбайн кĕрхи тулла вырса тĕшĕленĕ.
- Çурхи культурăсем 3100, кĕрхисем 325 гектар йышăнаççĕ, - пĕлтерчĕ ăна общество ертÿçи Анатолий Федоров. - Механизаторсене уйрах апатлантаратпăр.
- Çĕнĕ техника хатĕрĕпе ĕçлеме кăмăллă, - терĕ Раççей ялхуçалăхăн тава тивĕçлĕ ĕçченĕ Изосим Романов комбайнер.
Регион ертÿçи Канаш районĕнчи Карăклă ялĕнчи «АСК-Канаш» общество ĕç-хĕлĕпе те кăсăкланчĕ. Хуçалăх 800 гектар тулă акса çитĕнтернĕ, икĕ кун хушшинче саккăрмĕш пайне пухса кĕртнĕ. Кĕрхи культурăсем акма çĕр хатĕрлеççĕ.
Михаил Игнатьев ĕçлĕ çулçÿреве пĕтĕмлетсе çапла каларĕ:
- Çĕр ĕçченĕсен тупăшлă ĕçлеме хушма май пур. Ялхуçалăх халĕ ĕçлĕ çынсене ытларах илĕртет. Çамрăксене унта нумайрах явăçтармалла тата хăйсене кăтартма пулăшмалла. Эпĕ вырма ĕçĕсемпе кăмăллă. Пирĕн тĕп тĕллев - çутçанталăк паракан кашни сехетпе ĕççире тухăçлă усă курасси.
С.СЕРЕГИН
Источник: "Хыпар"