23 апреля 2013 г.
Ĕнерхи кун тĕлне пĕрчĕллĕ тата пăрçа йышши культурăсене республикипе - 805, çав шутра Патăрьелсем - 345, Комсомольскисем - 80, Пăрачкавсем - 150, Вăрмарсем - 30, Елчĕксем - 160, Тăвайсем 40 гектар акнă.
Пăрачкав. Районта сеялкăсене чи малтан уя «Никулинский» ЯХПК кăларнă: тăпрана урпа варăнтараççĕ. Çуртрисем 839 гектар йышăнĕç. Мĕн пур хуçалăх уйĕнче кĕрхи культурăсене апатлантараççĕ, çурхисен вăрлăхне им-çамлаççĕ. Хуçалăхсене минерал удобренийĕ, бензин-дизтопливо турттараççĕ.
Патăрьел. Акана пуçлаканни - «Красное Знамя» ЯХПК: ака уйăхĕн 18-мĕшĕнче 10 гектар çинче урпа акнă, кĕрхи çĕртме лаптăкне 20 гектар кăпкалатнă. Районти 17 хуçалăх çурхи ĕçе пикеннĕ. «Гвардеец», «Труд», «Жизнь» хуçалăхсен хирĕнче нумай çул ÿсекен курăксене апатлантарнă. Кĕрхи çĕртме лаптăкне 120 гектар кăпкалатнă, пин тонна тырă вăрлăхне им-çамланă, 4 пин тонна çĕр улми вăрлăхне сăмсалантарма путвалтан кăларнă.
ЕлчĔк. Ака уйăхĕн 19-мĕшĕ тĕлне районти 22 предприятирен 17-шĕ акана тухнă. «АСК-Яльчики» хуçалăх хирĕнче азот удобренийĕпе кĕрхисене кĕске хушăра 400 гектар апатлантарнă. Ку ĕçе «Яманчурино», «Победа» хуçалăхсем вĕçленĕ. «Комбайн», «Рассвет», «Прогресс» обществăсем пĕр çул çитĕнекен курăк акаççĕ.
Тăвай. «Акконд-агро», «Дружба», «Чутеевский» хуçалăхсен, Л.В.Канясев тата С.В.Хумышев ХФХ уйĕнче те ака вăй илет. «Акконд-агро» механизаторĕ Владимир Данилов пĕр кунтах 90 гектар люцерна лаптăкĕнче нÿрĕк тытнă.
Вăрнар. Акана пирвай «Янгорчино», «Санары», «Мураты» хуçалăхсем пуçăннă. Кĕрхи культурăсене апатлантараççĕ, çурхисене акма çĕр хатĕрлеççĕ. 4800 тонна çĕр улми вăрлăхне сăмсалантарма кăлараççĕ.
Михаил ФЕДОРОВ
Источник: "Хыпар"