26 сентября 2012 г.
Халĕ ялсенче ĕне тытакансен йышĕ сахаллансах пырать. Çакна ахаль куçпах курма пулать. Ватăраххисен вăй çитмест, çамрăк çемьесем асапланасшăн мар ĕне выльăх тытса. Çийĕнчен тата сахал мар çамрăк республика тулашне ĕçлеме çÿрет. Çавăнпа ĕнесен йышĕ катăлсах пырать çулран çул.
Çăлпуçĕнче, авă, вун виçĕ – вун тăватă ĕне кăна юлнă теççĕ çынсен кил хуçалăхĕсенче, Тăвайри Çĕнтерĕве 40 çул урамра сакăр ĕнерен – пĕрре. Каплах пырсан, ял-ялĕнче ĕнесем сайра тĕл пулакан е пĕтсе пыракан выльăхсен шутне кĕрĕç вĕт. Çакăн патне питĕ çитес марччĕ. Телевизор пăхатăн та, хуларан яла пынă мăнукĕсем ĕне тытакан асламăшĕ сĕтел çине лартса панă çăра хăймана епле юратса та хапăлласа тутанаççĕ. Анчах хăйма мĕнле пулнине пĕлеççĕ-ши хăть? Хăй тĕллĕн пулмасть-çке вăл. Чи малтанах килте ĕне усрамалла, ăна валли тĕрлĕ выльăх апачĕ çителĕклĕ хатĕрлемелле тата ĕнене çулла та, хĕлле те пĕр пек лайăх пăхса усрамалла. Вара, чăнах та, сĕтел çине кăларса лартма ĕне выльăх юр-варĕ çителĕклĕ пулĕ. Тен, ытлашширех сĕт-çăвне сутса кăштах хушма укçа-тенкĕ тума та май килĕ. Чăн та, халăхран сутăн илекен сĕт хакĕ çав-çавах тивĕçтерсе каймасть, ăна йÿнĕпе туянаççĕ.
Качака усракан çемьесем те пур ялсенче. Унăн сĕчĕ те усăллă. Çакăнпа пĕрлех райцентрта тата ялсенче ĕне усракансен йышĕ те чакса ан пытăрччĕ. Хавхалантармалли майсем, условисем пирки тимлесчĕ. Юлашки çулсенче продукци туса илме тухакан тăкаксене кăштах та пулин саплаштарма пăртакшар укçа хушса тÿлеме тытăнчĕç-ха. Анчах ку мера питĕ çителĕксĕр выльăхсен йышне упраса хăварма тата сĕт продукцийĕ, ытти юр-вар туса илессине ÿстерсе пыма, уншăн хавхалантарма.
Источник: "Ял ĕçченĕ"