01 февраля 2012 г.
Çуркунне çывхарнă май нумайăшĕ акма-лартма вăрлăх хатĕрлеме тытăнать. Фермерсемпе хушма хуçалăхсем ăна ытларах ятарлă лавккасемпе пасарсенче туянаççĕ. Вăрлăха кура тухăçĕ, çимĕçĕ. Апла кунта уйрăмах асăрхануллă пулмалла. Россельхознадзорăн республикăри управленийĕ çулталăк пуçламăшĕнчех «Вăрлăх туса илесси» саккуна пăснă тĕслĕхсем тупса палăртнă. Акă «Мир семян», «Природа» лавккасенче патшалăх реестрне кĕртмен «Витаминка», «Мо», «Красное без сердцевины», «Флакке» кишĕрпе «ЧупаЧупс» редис сорчĕсене сутнă. Вĕсем вара усă курма юрăхсăр шутланаççĕ. Пĕлтĕр вăрлăх сахал пулнă май республикăна ăна ытти регионтан та кÿрсе килнĕ. Çавăнпа вĕсене уйрăмах тимлĕ тĕрĕслеме тивнĕ. Патшалăх инспекторĕ Валентина Никитина каланă тăрăх управлени специалисчĕсем 500 тонна ытла вăрлăх тĕрĕсленĕ. Çав шутран маркиров-кăпа килĕшсе тăманни – 97, пахалăх документра кăтартнипе тÿр килменни – 82, нумай çул ÿсекен курăксен тата пахча çимĕç культурисен ятарлă сертификачĕ пулман 13 тонна вăрлăх тупса палăртнă. Реестра кĕртмен пахча çимĕç культурин вăрлăхне те самай кÿрсе килнĕ-мĕн.
Ял хуçалăх культурисен акмалли-лартмалли материалĕсене сутакан 73 уйрăм пайтаçăна тĕрĕсленĕ. Йĕркене пăснă 45 тĕслĕх палăртнă. Ытларах вĕсем вăрлăха акнă, сутнă, упранă чухне йĕркене пăхăнманнипе, документсен ĕçне кирлĕ пек туса пыманнипе çыхăннă. Должноçри йĕркене пăсакан сакăр çынна 5, 0 пин тенкĕлĕх штрафланă, улттăшне асăрхаттарнă.
Пахалăха палăртассипе лабораторире 1, 45 пин тонна вăрлăх тĕпченĕ. Тĕрĕслевре 0, 36 пин тонни сорчĕпе тата пахалăхĕпе документра кăтартнипе тÿр килмен.
Асăннă ведомство специалисчĕсем вăрлăх туяннă чухне çакна шута илме сĕнеççĕ. Хутаç çинче тавар сутакан организаци ячĕ, адресĕ, телефон номерĕ пулмалла, культура ячĕ тата сорчĕ реестртипе килĕшсе тăмалла. Стандарт палли (ТУ), парти номерĕ пуррине те шута илĕр. Йывăрăшне е шутне, усă курма юранин вăхăтне çырни те кирлĕ. Вăрлăх тĕлĕшпе иккĕленÿ çуралсан пирĕн управленине пĕлтерĕр: Шупашкар хули, 9 çурт, 54–55–61, 52-80-29.