05 октября 2010 г.
Юпа уйăхĕн 1-мĕшĕнче республикăри агропромышленноç комплексĕнче ĕçлекенсен делегацийĕ Чăваш Республикин Президенчĕ Михаил Игнатьев ертсе пынипе Мускав хулинче Пĕтĕм Раççейри «Ылтăн кĕркунне» курав мероприятийĕсене хутшăннă.
Раççей Федерацийĕн Правительствин Председателĕ Владимир Путин Чăваш Республикин экспозицийĕсемпе те интересленсе паллашнă. Вăл палăртнă тăрăх «Ылтăн кĕркунне-2010» - чаплă йăла, унта агропромышленноç комплексĕн чи лайăх çитĕнĕвĕсене кăтартаççĕ. Кăçал куравра çĕр-шывăн 55 регионĕнчи 1000 предприяти тавар тăратнă. Курава чикĕ леш енчи 32 çĕр-шыври фермерсем те хутшăнаççĕ. Литва Республикин Раççейри посолĕ Антанас Винкус тата Литва ял хуçалăх министрĕ Казис Старкявичус хăйсен экспозицине Владимир Путина кăтартнă хыççăн Чăваш Ен çитĕнĕвĕсемпе паллашма васканă. Сумлă хăнасем чăвашăн ĕçмине тутаннă, çĕнĕ таварĕсене пахаланă, хамăр республикăри Етĕрне районĕнчи Мăн Явăш ялне комплекслă тумалли тата тирпей-илем кĕртмелли проектпа паллашнă. Ун хыççăн Мускав - Мăн Явăш телекĕпер хăнасене Сергеевсен çемйипе çыхăнтарнă. Вĕсем проект, çĕнĕ çурт тумалли условисем çинчен тĕплĕн каласа панă. Литва ял хуçалăх министрĕ хăйĕн тăван çĕр-шывĕнче çакнашкал проекта ĕçе кĕртмелли майсене пăхса тухассине палăртнă. Чăваш Ене ял хуçалăхĕнчи çĕнĕ проектсене пурнăçламашкăн килме шантарнă.
«Ылтăн кĕркунне-2010» курав ял хуçалăх çулне пĕтĕмлетет. Чи кирли - типĕ çанталăк синкерне пăхмасăрах ял хуçалăхĕнче тавар туса кăларакансен кăмăлĕ лайăх, хавхалануллă, вĕсем малашне те ăнăçлă ĕçлесшĕн. Кунта Чăваш Ен паха, экологи тĕлĕшĕнчен таса продукци тăратнă. Курав ĕçленĕ вăхăтра эпир çакна тепĕр хут курса ĕнентĕмĕр: пирĕн тавара пурте туянаççĕ. Мускавсем тутанса пăхнă хыççăн пирĕн апат-çимĕçе хăйсен лавккисенче курасшăн пулнине палăртаççĕ. Пирĕн тĕллев - конкуренцие хутшăнса чăвашăн таса çимĕçне Раççей рынокне кĕртесси», - тенĕ Михаил Игнатьев журналистсемпе калаçнă чухне. Ют çĕр-шыва ăсатакан таварсем çинчен сăмах пуçарнă май Президент çакна палăртнă: «Мускав хулин администрацийĕ хăйĕн саккасне Чăваш Енĕн аш-какай тата сĕт продукцине кĕртет. Енчен те унччен Мускав хулин саккасĕнче çĕр улми пайĕ 25 процент пулнă тăк паян çак тавара вырнаçтарас шанăç тата ÿсет».
Чăваш Ен Президенчĕ Михаил Игнатьев курав экспозицийĕсемпе паллашнă май Карачай-Черкес Республикин стенчĕсен умĕнче чарăнса тăнă, кăсăклă калаçу вăхăтĕнче суту-илÿпе экономика тата культура енĕпе çыхăну тытмалли ыйтусене сÿтсе явнă.
«Ылтăн кĕркунне» агропромышленноç куравĕнче пысăк пĕлтерĕшлĕ тата тепĕр пулăм пулчĕ - Чăваш Республики çĕр-шыври регионсенчен чи малтан «Россельхозбанк» АУОпа тата та тачă çыхăну тытмашкăн çирĕплетнĕ. Михаил Игнатьев Президент тата «Россельхозбанк» АУО Правленийĕн Председателĕ Дмитрий Патрушев Ял хуçалăхне аталантармалли тата ял хуçалăх продукцийĕн, чĕр таварăн тата апат-çимĕçĕн рынокĕсене йĕркелемелли патшалăх программине пурнăçлас енĕпе ĕçлеме Килĕшĕве алă пуснă. Ăна пурнăçласа Россельхозбанк Чăваш Ен Министрсен Кабинечĕпе пĕрле ял хуçалăхĕнчи тавар туса кăларакансене кредит памалли, вăтам агробизнеса аталантармалли пĕрлехи программăсене, çавăн пекех агропромышленноç комплексĕн организацийĕсене финанс тĕлĕшĕнчен сыватмалли, вĕсен парăмĕсене реструктуризацилемелли программăсене пурнăçлĕç. «Кредитсене тĕнче шайлĕ ку чухнехи теплица тума ярĕç. Выльăх-чĕрлĕх, ашлăх выльăх ĕрчетес енĕпе проектсем пур. Кунсăр пуçне, çулталăкне 6 пин тонна кăркка ашĕ туса илес енĕпе Литвари ĕçченсемпе çыхăну йĕркелес шанăç пур», - тенĕ Чăваш Ен Президенчĕ.
«Россельхозбанк» АУО Правленийĕн Председателĕ Дмитрий Патрушев палăртнă тăрăх - республикăри ял хуçалăхне аталантарма банк 5 млрд тенкĕ хывнă. Вăл Чăваш Ен экономикине укçа-тенкĕпе ытларах пулăшни регионти ял хуçалăх производствине малалла аталантарма май пани çинчен каланă. Правлени Председателĕ çакна та палăртнă: «Типĕ çанталăк хыççăн агропромышленноç комплексне пулăшни - банк приоритечĕ. Çак тĕллевпе шăрăх çанталăка пула инкек тÿснĕ регионсене илнĕ кредитсене виçĕ çултан çеç парса татмалла тăватпăр, нимĕнле комисси те илместпĕр. Сахал тата нумай вăхăтлăх кредитсем тăрăх эпир процент ставкисене пĕрре çеç мар чакартăмăр».
Çĕр-шыври тата Чăваш Енри çĕр ĕçченĕсене Кремльте Раççей Правительствин Председателĕ В.Путин саламланă, ĕçченлĕхшĕн, çине тăнăшăн тав тунă. Ял хуçалăхĕнчи, уйрăмах чăх-чĕп тата сысна ĕрчетес ĕçри çитĕнÿсене палăртса çапла каланă: «Пĕрле эпир кирек мĕнле йывăрлăха та çĕнтерĕпĕр».
Ял хуçалăхĕнче тата продукци тирпейлекен промышленноçра ĕçлекенсен кунне халалланă савăнăçлă пуху уяв концерчĕпе вĕçленнĕ.
Источник: "Хыпар"