01 июня 2010 г.
Çулленех пулма тÿр килет дояркăсемпе осеменаторсен конкурсĕнче. Кашнинчех вĕсен пултарулăхне курса савăнатăп. Çавăнпа хама фермăра тăрăшакансем хушшине лартса та пăхнă пуль тепĕр чухне. Çăмăл пек туйăнать çиелтен пăхсан, аппарата ĕне чĕччисене тăхăнтар та, пулчĕ те. Сĕт хăех бидона тулать. Çук çав, кунта та ĕç вăрттăнлăхĕ пур. Витесене шуратса тирпейлесех тăмалла, кашни ĕнепе тимлĕ пулмалла, тата сывлăхне сăнаса тăма та ĕлкĕрмелле, вăхăтра апатлантармалла, сунă чухне тасалăх правилисене çирĕп пăхăнмалла. Ăмăртура малта пыракан дояркăсен вара сĕт нумай паракан ĕнесене тав тăвасси те йăлана кĕнĕ ахăртнех. Выльăхсем кашни çулах пăрулаччăр тесе тимлекенсен ĕçĕ те ответлă. Кĕскен каласан – фермăра ĕçлекенсен çаврăнăçуллă, тÿсĕмлĕ, çирĕп чунлă пулмалла.
Кăçал районти осеменаторсемпе дояркăсен конкурсĕ Хумышев хресчен фермер хуçалăхĕнче иртрĕ. Çĕнĕ Ишпуç ферми ялтан инçетре, вăрман варринче вырнаçнă. “Çакнашкал илемлĕ вырăнта çÿреççĕ те ĕнесем, сĕт те нумай антараççĕ пулĕ”, – тесе шухăшласа та илтĕм. Асăннă коллективра 107 мăйракаллă шултра выльăх шутланать, вĕсенчен 61-шĕ – сăваканни. Арăмĕпе упăшки, Зоя Германовнапа Владимир Ильич Баталовсем пăхаççĕ иккен выльăхсене. “Юратса ĕçлеççĕ”, – терĕç вĕсем пирки.
Райадминистрацин ял хуçалăхĕпе экологи пайĕн ертÿçи В.Ванерке сăмах илчĕ малтан. Районта та, республикăра та аш-какайпа сĕт туса илессине пысăк тимлĕх уйăрнине, ял хуçалăхĕнчи лару-тăрăва лайăхлатма тĕрлĕ çăмăллăхсем, укçа-тенкĕ парса пулăшнине палăртрĕ Владимир Алексеевич. Кадрсен ыйтăвĕ çивĕч тăни, чуна парса ĕçлекен дояркăсемпе осеменаторсен йышне ÿстерсех пыма кирли пирки асăнчĕ, конкурса хутшăнакансене çĕнтерме ырă сунчĕ. Хумышев хресчен фермер хуçалăхăн хуçи Сергей Витальевич хăйсен ĕçĕ-хĕлĕпе кĕскен паллаштарчĕ, ĕмĕт-тĕллевĕсем çинче чарăнса тăчĕ. Çамрăк ертÿçĕн шухăшĕсем пĕчĕк мар, вăл çĕр ĕçченĕн пурнăçĕ аванланасса çирĕп шанать.
Ял хуçалăхĕпе экологи пайĕн зоотехникĕ Елена Александровна Михайлова конкурссен йĕрки çинчен тĕплĕн каласа кăтартрĕ.
Çĕнĕ Ишпуç ферминчи кану çурчĕн пĕр пÿлĕмĕнче дояркăсем, тепринче осеменаторсем хатĕрленчĕç. Машинăпа ĕне сăвакан операторсем – Н.Козлова (”Чутеевский”), Л.Шуйкова (Грачев ХФХ), А.Антонова (Акконд–агро”), А.Даниловпа И.Герасимова (”Красная Чувашия”), Е.Георгиева (”Шимкусский”), З.Баталова (Хумышев ХФХ) малтан ыйтусем çине хуравларĕç. Ку конкурс вĕсемшĕн йывăр пулмарĕ пулас. Хăйсен ĕçĕнчи правилăсене аван пĕлеççĕ эппин ферма работникĕсем.
Ĕне сумалли аппарата мĕнле салатса пухмаллипе пĕлтĕр республикăна кайма тивĕçлĕ пулнă А.Медведева доярка (”Шимкусский“) паллаштарчĕ. Шăпа янă хыççăн А.Антонован (”Акконд–агро”) пуçламалла пулчĕ конкурса. Кашни хăйĕн аппаратне илсе килнĕ пулас, пурте ĕçре ăна кулленех салатса пухаççĕ ĕнтĕ. Конкурсра та маххă памарĕç вĕсем.
Осеменаторсене тупăшу правилисем çинчен районти ветстанци врачĕ Э.Захаров каласа пачĕ. Н.Дмитриева (ветстанци) чи хăюлли пулчĕ. Вăл ĕнесене вăхăтра пĕтĕлентерес йĕркене аван пĕлнине кăтартрĕ. С.Цирульникова (”Чутеевский”), А.Юзукова (Грачев ХФХ), В.Иванова (”Акконд-агро”), И.Иванова (Эльпуçĕнчи ветучасток) осеменаторсем те унран юласшăн пулмарĕç. Конкурса хутшăнакансен пăру илес кăтартăвĕ мĕнле пулнине те шута илчĕç кунта.
Дояркăсемпе пĕрле витене çул тытрăмăр юлашкинчен. Конкурс ирттерме тĕплĕн хатĕрленнĕ иккен ишпуçсем, витене шуратнă, ĕнисене те лайăх тасатнă. С.Хумышев ертÿçĕпе И.Егорова ферма заведующийĕ чылай тăрăшнă ĕнтĕ çакăншăн. Машинăпа ĕне сăвакан операторсем хăнăхнă ĕçе начар мар пурнăçларĕç.
Виçĕ конкурсне те пĕтĕмлетнĕ хыççăн “Шимкусский” ЯХПКран килнĕ Е.Георгиева чи нумай бал пухни çирĕпленчĕ. Пĕлтĕрхи çĕнтерÿçĕ А.Медведева ĕçтешĕн çитĕнĕвĕшĕн питĕ савăнчĕ, чи малтан саламларĕ Екатерина Геннадьевнана. Иккĕмĕшпе виççĕмĕш вырăнсене И.Герасимовапа (”Красная Чувашия”) З.Баталова (Хумышев ХФХ) пайларĕç. Районта пирĕн пĕртен-пĕр дояр пур. Вăл “Красная Чувашия” ЯХПКра вăй хурать. А.Данилов маттурлăхне те палăртрĕç. Осеменаторсенчен чи пултарулли В.Иванова (”Акконд–агро”) пулчĕ. Грачев хресчен фермер хуçалăхĕнчи А.Юзукова – иккĕмĕш, И.Иванова (Эльпуçĕнчи ветуч.) виççĕмĕш вырăнсене тухрĕç.
Çĕнтерÿçĕсене, конкурс ирттерме пулăшнă хуçалăха тата ыттисене те ял хуçалăхпа экологи пайĕн ертÿçи В.Ванерке ăшшăн саламланă, хаклă парнесемпе чысланă. Конкурс йĕркелекенсем Хумышев хресчен фермер хуçалăхне, спонсорсене тав тăваççĕ.
Çĕртме уйăхĕнче Е.Георгиева дояркăпа В.Иванова осеменатор республикăри ăмăртура Тăвай ен чысне хÿтĕлĕç.
Источник: "Ял ĕçченĕ"