26 февраля 2010 г.
ВИКТОР Александровпа Геннадий Ильин мĕн ачаран ĕçе юратса ÿснĕ. Шкул хыççăн иккĕшĕ те Киров ячĕллĕ колхозăн выльăх-чĕрлĕх ферминче ĕçленĕ, çул çитсен салтак службинче пулнă. Çартан таврăнсан та выльăх-чĕрлĕхрен уйрăлман: Виктор фермăра слесарьте, Геннадий бригадирта вăй хунă.
2005 çулта колхоз саланнă хыççăн В.Александровпа Г.Ильин ĕçсĕр тăрса юлнă. Районти ĕçе вырнаçтаракан Центрта учетра тăнă май, обществăлла ĕçсене хастар хутшăннă.
Центр специалисчĕ харпăр-хăй ĕçне йĕркелесе яма сĕнсен, Викторпа Геннадий пĕр турткаланса тăмасăрах килĕшнĕ. Кăçалхи февральте вĕсем мăйракаллă шултра выльăхсем ĕрчетес енĕпе бизнес-плансене ăнăçлă хÿтĕленĕ, çапла вара патшалăхран кашниех каялла тавăрса памалла мар 58800-шер тенкĕ субсиди илнĕ. Фермерсем хăйсен ĕçне çаннисене тавăрсах пуçăннă.
Тĕллевлĕ программăпа килĕшÿллĕн, районта кăçал 89 çынна харпăр-хăй ĕçне йĕркелемешкĕн укçа парса пулăшма пăхнă. Çакăн валли 5 миллион та 292 пин тенкĕ уйăрнă. Паянхи куна 6 çын харпăр-хăй ĕçĕсене йĕркеленĕ ĕнтĕ.
С.КУЗЬМИН, районти ĕçе вырнаçтаракан Центр директорĕ.
Источник: "Шăмăршă хыпарĕ"