11 февраля 2010 г.
Шупашкарта февралĕн 18-19-мĕшĕсенче регионсен «Çĕр улми – 2010» форумĕ иртет. Ăна йĕркелекенсем – ЧР ял хуçалăх министерстви, Раççей ял хуçалăх академийĕн А.Г.Лорх ячĕллĕ тĕпчев хуçалăхĕ, Чăваш Енри «Агро-Инноваци» унитари предприятийĕ.
Курав-форума Раççейри 15 регионран 70 организаци хутшăнма кăмăл тунă. Çав шутра Мускав, Санкт-Петербург, Ярославль хулисенчен, СШАн Небраск штатĕнчен, Нидерланди Королевствинчен, Беларусь Республикинчен, Украинăран та çитмелле.
Куравăн пĕрремĕш кунĕнче регионсен хушшинчи 11-мĕш наука-практика конференцийĕ уçăлĕ. Тĕп тема – «Çĕр улмине упрас, тирпейлес, туса илес инноваци технологийĕ». Форумра «çавра сĕтелсем», ларусем иртмелле. Çакă отрасльти çĕнĕлĕхсемпе, малта пыракан опытпа, çĕнĕ сортсемпе, технологипе паллашма май парĕ.
МТВ-Центр территорийĕнче организацисемпе халăх валли çĕр улми вăрлăхне сутĕç. Ăна килех илсе пырса парĕç. Малашне «Çĕр улми» курав Чăваш Енри паллă пулăмсенчен пĕри пулса тăрас шанчăк пысăк.